Moonlight Drawn by Clouds

Park Bo Gum var deyə başlamışdım amma..

 Bu il o qədər yeni dramalar başlayır ki, insan artıq hansına baxsın bilmir. Çox iddialı və ya yeni sevilən aktyorlar, aktrisalar dramalarla geri qayıdır. Park Bo Gumu biz Reply 1988-dən tanımış və aktyorluğunu bəyənmişdik. Yeni dramasının hələ treyleri (trailer) çıxdığı zaman bu dramanın fərqli olacağını düşünmüşdüm. Kraliyyət dövründə gangam stilində bir video heç birimiz gözləmirdik. Sarayda Fləşmob(flashmob) havasındakı videonun ilk dəqiqəsindən insan ritm tutur, gülümsəyərək izləyir. 

Seriala tam olaraq mövzunu araşdırmadan başladım. Düzü drama haqqında yalnız baş rol qızımızın bir Asiya klassikası olan qızın oğlan paltarı geyib ətrafda özünü oğlan kimi təqdim etməsini bilirdim. Bu klassika və xüsusilə də tarixi serial havası mənə Sungkyunkwan Scandal -ı xatırlatdı. Bu tipdə şahzadə heç gözləmirdim. 

İzlədikdən sonra isə çox sevdim və bu səbəbdən siz də izləyin deyə sizinlə fikrimi paylaşmaq qərarına gəldim. 
Dramanın adı: Love in the Moonlight/ Moonlight Drawn by Clouds. (Ay işığında sevgi)
Hangul/Koreya: 구르미 그린 달빛
Senarist:  Yoon Yi-Soo (web novel/webtoon/internet romanı), kk (web novel), Kim Min-Jung, Im Ye-Jin
Rejissor:  Kim Sung-Yoon
Yayımlandığı Kanal: KBS2
Bölüm Sayı: 18
Yayım tarixi: 22.08.16- 18.10.16
Yayım gün və saatı: Bazar ertəsi&Çərşənbə axşamı 22:00
Dil: Koreya dili/Hangul
Ölkə: Cənubi Koreya
Əsas aktyor heyəti onların oynayacağı obraz və dramanın hekayəsi isə belədir. 

Park Bo Gum/ 박보검 - Lee Young (Vəliəhd Şəhzadə Hyomyeong) rolunda. 
Vəliəhd şəhzadədir. Çox ağıllı və yaraşıqlı, eyni zamanda bacarıqlıdır. Ancaq baş rolumuz bir şəhzadə olaraq kral oğlu olmağın məsuliyyətindən çox ilk üstünlüklərindən yararlanır. :D Kralın yeganə oğlu olduğu üçün də istədiyini etməkdə azaddır. Çünki itirməkdən qorxacağı heç nə (taxt-tac) yoxdur. Əslində çox taxt-tac sevər də deyil. Hakimiyyət davasına çıxacağı qardaşı da yoxdur. İzlədiyimiz zaman isə, haqqında daha çox sirləri xüsusilə gələcək bölümlərdə az-az izləyib öyrənəcəyik. Baş rol qızla, qızın işindən dolayı tanış olacaq. Xarakterindəki tərsliyə görə sarayda ona verilməyən ad yoxdur. Təbii ki heç birindən xəbəri yoxdur. İlk eşidəndə üzünü görməyə dəyər. Çünki özündən çox razıdır. ;)

Kim You Jung/ 김유정- Hong Ra On rolunda.
 Aktrisanın yaşının azlığı düzü sevmədiyim bir şey oldu. Aktrisa 1999-cu ildəndir.  Ancaq aktrisalıq bacarığını çox bəyəndim. Oğlan geyimində hərəkət və danışığı çox şirindir. Oğlansı davranmağa çalışır. Əsas səbəb budur ki, şirin görünməyə yox oğlan kimi danışmağa çalışır. Ən çox da qarşısındakının yuxarı təbəqədən olduğunu biləndə və ya işinin ondan asılı oldğunu biləndə davranışını, danışığını bəyənirəm. :D  Çox iri və gözəl gözləri var. 
Bu qız demək olar ki, setlərdə böyüyüb. :D Şəkildən də demək istədiyimi anladınız. :D Bu qız ancaq böyüdükcə gözəlləşir və bu gedişlə Suzydən daha gözəl olacaq. 

Hong Ra On ailəsinin kim olduğunu bilmir, daha doğrusu biz bilmirik. Hələki sirdir bizə. Sirkdə işləyir. Ancaq həyatını dəyişəcək işi isə, gənc oğlanlarından adından sevdikləri qızlara(və ya tanış olmaq istədikləri) sevgi məktubu yazmaqdır. Bu məktublar sayəsində şəhzadə Lee yong la qarşılaşır. Aralarında xırda bir mübahisə də olur. Lee yongun vəliəhd şəhzadə olduğunu bilmədiyi üçün onu meşədə köməksiz qoyub qaçır. 
Bir daha onunla qarşılaşacağını düşünmədiyi üçün isə bunun qarşılığında bir də görsə onun iti belə olacağını və nə istəsə edəcəyini söz verir. Bu hissədə drama diqqətinizi daha çox çəkdi deyil mi? Etiraf edin, əyləncəli olacağını düşündünüz. 
Jin Young/진영 - Kim Yoon Sung rolunda. 

Bu oğlanın dramadkı adı ilə baş rol qızın əsl adı niyə bu qədər bənzəyir?!
Jin Young əslində aktyor deyil, B1A4 adlı kpop qrupunun üzvüdür. Kim Yoon Sung çox ağıllıdır. Rəsm çəkməyi çox sevir. Hong R On un qız olduğunu onu gördüyü andan anlayır ancaq bildirmir. Oxuduğunuzdan da artıq anladığınız kimi ikinci oğlan odur. Onun vəliəhd şəhzadə (Park Bo Gum) ilə olan münasibəti də diqqət çəkir. Soyuq münasibətləri olsa da bunun əvvəllər belə olmadığını öyrənəcəyik. Babası sarayda 


kraldan belə daha çox gücə sahibdir. Artıq ikinci oğlan olacağını bildirən şəkillərimiz də var. ;)
Spoisiz və dolğun yazmaq bir azca çətin olsa da sizə 1 və 2. bölümdən heç spoi verməyəcəm. 
Chae Soo Bin/채수빈- Jo Ha-Yeon rolunda. 

Bu qız da çox güman hər görəndə əsəbləşəcəyimiz ikinci qız olacaq. Ümidvaram rejisor aranı çox qatmaz. Çünki qarışıqlığı bəyənmirəm.

Jung Hye Seong/정혜성- Şəhzadə Myungeun rolunda.
Çox şirin qızdır. İlk onu şişman görəcəyik, ancaq qrimlə üzünü şişirtdiklərini nəzərə alsaq arıqlamasına çox qalmayıb. Hong Ra On (baş rol qız) özü də bilmədən sifarişlə məhz bu qıza da sevgi məktubu yazıb. Ancaq nə bilsin ki yazdığı məktub kimə gedir. 
Hətta ilk görüşə də məktub adına yazılan oğlanın əvəzinə qız özü gedir. Ancaq onu orada şəhzadə deyil, Lee Young (qızın qardaşı vəliəhd şəhzadə, yəni baş rol oğlan)  qarşılayır. 
Elə hər şey də burdan başlayacaq. Qızın şişman görünüşünü də görüb müqayisə edə bilərsiniz. Bu qrim formasında ilk Shin Min Ah da Oh My Venus serialında görmüşdük. Mənim ən azı dramalar içində yalnız o serial yadımda qalıb. 
Kwak Dong Yeon/곽동연- Kim Byung Yeon rolunda.
O adlardakı Yeon lar yəgin sizi də bir anlıq çaşdırdı. Şəhzadənin 2 yaxın dostundan biri olduğunu və uşaqlıqdan onunla böyüdüyünü bilirik. Sarayda fanları belə var :D Rejisordan xahişim bu oğlanı da baş rol qızla birləşdirmə yoxsa bu artıq 3. oğlan olacaq və mən də 2. oğlan deyil 3.oğlan üçün daha çox kədərlənəcəm. :/ Şəhzadə qızla da yaraşardılar ha amma izləyək görək nə olacaq. :D Aranızda bu aktyoru hardasa gördüyünü düşünənlər üçün isə bir xatırlatma edim. Aktyor Inspiring Generation-da Kim Hyun Joong-un gəncliyini oynayırdı. Ona o qısa saçlarla çox bənzəyirdi ancaq bu dramada çox dəyişib. Uzun saçlar super yaraşıb. Yapon havası var sanki üzündə deyilmi?
Bu dramada da mənfi rol olmazsa olmaz. Koreya draması olduğunu nəzərə alsaq sonda onun da özünə görə səbəbləri çıxmasını istəmirəm doğrusu. Həmin obraz isə Şahın baş vəziridir. Az qala oynadığı bütün dramalarda pis rolu oynayıb da rolunun haqqını verən adam. 
Cheon Ho Jin/천호진-Kim Hun rolunda. 

Təsadüfə baxın sentyabrın 9-u tam da aktyor haqqında yazdığım gün onun ad günüdür. Şəklin keyfiyyəti haqqında isə deyəcəyim budur- Bu qədər tarixi keçmişə aid rəsm hələ yaxşı keyfiyyətlə qalıb. :D İşin doğrusu odur ki bu dramadan aktyorun normal şəklini tapa bilmədim. 

  

 
Drama çox şirin və əyləncəlidir. Hadisələr sirlərin açılması ilə bir az da dəyişəcək. Ən azı o video üçün bir şans verin. Başladıqdan sonra gerisi onsuz da gələcək. Əyləncəli olsun ancaq tarixi drama olsun deyəclər üçün mükəmməl serialdır. İzləyənlər fikirlərini, izləmədən blogdan postumla dramanı tanıyanlar siz isə rəyinizi aşağıya yazmadan getməyin. Sona qədər oxuduğunuz üçün təşəkkürlər. 

MIM№

Mim : Mid-Year Book Freakout   Salam, yeni mimdə bu ilin bu vaxtına qədər oxuduqlarımız haqqında suallara cavab yazırıq. Əyləncəlidir, çünki oxuduğumuz kitab haqqında kiməsə danışmağı, kitabdakı obrazları müzakirə etməyi əminəm çoxunuz sevirsiniz. Əslində bu mimi cavablandırarkən çətinlik çəkdim. Mən artıq sanki çoxdandır zaman anlayışını itirmiş kimi hiss etdim. Mənim üçün il məktəblərin tətil olması və ya açılması kimi dəyişikliklər sayəsində yadda qalan idi. Əgər hər günün eyni keçirsə, o zaman artıq zamanın ilin bəzən öz həqiqi mənasını itirdiyini düşünürsən. Ya da əslində zamanın heç bir mənası yox imiş, biz ona məna yükləməyə çalışırıqmış və zaman əslində böyük bir indidən ibarətmiş kimi. Keçmişdəki indiki zaman və gələcək indiki zaman. Bəs mənim sizə bunu dediyim zaman bunların hansındadır? Keçmiş ya gələcək?

 Kimə görə? Axı kimə görə olması zaman anlayışını da dəyişir. Yenə də, əslində mövzuya aid olmayan fikirlərimi sizlə bölüşdüm. Ancaq bu sadəcə özlüyündə gələn fikirlərdir. Yəgin bu haqda siz də düşünün deyə elə məhz bu yazını yazdığım zaman bu fikirlər beynime gəlib. Çox yormayım sizi, keçək mimə. 
Sondakı mahnı da məndən sizə hədiyyə olsun. 

1. Bu ana qədər oxuduğum ən gözəl kitab.

Sleeping Wolf/Uyuyan Canavar.

Sadəcə keyfiyyətli musiqi Dinləməyi sevənlər üçündür.

   Təsəvvür edin ki, bir musiqi qrupunu təsadüfən kəşf edirsiniz. Bu qrup o qədər də məşhur deyil. Ən azından youtube da mahnıları milyon izləyici sayı ilə bəzənməyib. Ancaq siz onun xüsusi olduğunu anlayırsınız. Kiçik olsa da qəribə qığılcımı duyursunuz.-Elə bu yazıdakı hərflər kimi kiçik amma nədənsə bu diqqəti cəlb edir və sizi oxumağa vadar edir. Yeni yeni məşhurlaşan qrupu tanımayan varsa bir şans versin.

Sleeping Wolf qrupu ilk olaraq öz adı ilə maraqlı görünür. Qrupun mahnılarını dinlədim və həqiqətən də çox bəyəndim. Qrup haqqında demək olar ki, məlumat tapa bilmədim. Ancaq biz fərqli musiqi dinləmək üçün burdayıq deyilmi?! 

Qrup 2014-cü ildə prodüser Steven Solomon və sənətçi Jake Newton tərəfindən yaradılıb. Qrup bəzi tv proqramları və filmdən sonra daha çox tanınıb. 

İlk qrupun "Come and get me "adlı mahnısını dinləmişdim. Məncə həqiqətən də hit ola biləcək mahnılardandır. 

İlk mahnını bəyənidinizsə siz də qrupun digər mahnılarını dinləmək istəyərdiniz. Beləliklə ikinci mahnı və onu da çox sevdim. "Blindfold"

Xoş və bir o qədər də insana tanış gələn (aman plagiat olmasın da -_-) ritmlərlə "THE WRECK OF OUR HEARTS" dinləyin.

Bir az pozitivliyi artıran musiqi istəsəniz bu mahnını seçin. "DEMONS AT THE DOOR"

Ən sona isə ən sevdiyimi, daha doğrusu hələyeni dinləyib bəyənidiyim və dayanmadan qulaq asmaq istəidyim mahnını saxladım. ;) "Get You Alone" Video üçün seçdikləri çəkil də mahnı ilə çox gözəl uyub. Gözəl görünür.

Qrupun digər mahnılarını da dinləmək istəyənlər, rəngli yazını klikləyin qrupun  mahz axtardığınız rəsmi youtube kanalı və soundcloud səhifəsidir ki, orada digər mahnıları tapacaqsınız. qrupun rəsmi saytı üçün klikləyin.

Mahnılardan sevdiyinizin adını rəydə/yorumda yazın. Sizin də bənzər sevdiyiniz ifaçı və ya qrup varsa mənimlə paylaşın. 

Harry Potter sevərlərin yeni filmi.

Fantastic Beasts and Where to Find Them.

  Hər bir Harry Potter sevər kimi film haqqında gördüyüm ankı həyəcanımı, sevincimi, içimdəki qəribə qığılcımı təsəvvür edərsiniz. Film J. K. Rowling-in eyni adlı kitabı əsasında çəkilib. J. K. Rowling Harry Potter kitab seriyasının müəllifidir. Bu dəfə treylerində Harry potter soundtrackı eşitmək isə həyəcanımı ikiqat artırdı. İndi isə sizə bir az gözlədiyizdən fərqli yenilik deyim, film bu dəfə Harry və dostlarının deyil, Newt Scamander in macəralarını bizə göstərəcək. Ancaq bu da bir Harry Potter havası olduğundan izlənəcək. Ən azı mən izləyəcəm. Film 2016-cı il noyabrdan kinoteatrda yayımlanacaq. Azərbaycana da maksimum bir aydan sonra gələcəyini düşünür və ümid edirəm. Filmin azərbaycancada adı Fantastik heyvanlar(bədheybətlər) və onları harada tapmaq kimi tərcümə olunur. 
 Mən o köhnə dünya havasını treylerdən (trailer) artıq sevdim. 

Təxmin etdiyiniz kimi filmdə hadisələr XIX əsrdə (1926-cı il) cərəyan edəcək. İnşaAllah Harry Potter filmləri qədər şirin və maraqlı olar. Fantastik olacaq deyə film soyuq olmasın. Soyuq fantastik filmlər boldur. İçində dostluğa daha çox yer verilən Harry Potter ə bənzər film olsun istəyərəm. Doğrusu bu dəfə baş qəhrəmanımız məktəbli deyil, müəllim olacağı üçün hekayədə fərq mütləq olacaq. Bir də filmdə Harry Potter filmindən Dambledore u görmək ehtimalımız var, həm də bir az daha gənc olaraq. 
Hadisələr 1926-cı ildə Newt Scamander New Yorka, Amerika Birləşmiş Ştatlarına ABŞ Sehr Konqresinə gəlir. Burada o çox vacib bir şəxslə görüşməlidir. Treylerindən də görəcəyiniz kimi Newt Scamanderin artıq çox ağır bir məsuliyyəti var. Ona içi saysız sehrli bədheybətləri yaşadığı bir çamadan verilib. Çamadandan artıq bir neçə bədheybət dünyaya qaçıb. Yəgin ki, Newt Scamander həmin fantastik və təhlükəli canlıları geri qaytarmalıdır. Film haqqında çox da geniş bir məlumat yoxdur. Məlumat olduqca sizinlə bölüşərəm. Keçək aktyor heyəti ilə tanışlığa:
Filmin baş rolu aktyor Eddie Redmayne-a həvalə olunub. Doğrusu bu aktyoru o qədər də bəyənmədim. (Filmi bir tərifləyib bir pislədiyimi düşünməyin, filmə yenədə baxacam) Üz qurluşumu( dodaqları xüsusilə) ya mimikası ilə mi bilmirəm azca məni filmdən uzaqlaşdırır. Amma ümidvaram filmi izləyəndə bu tərəddüdüm yox olar.

Aktrisa Katherine Waterston isə əsl həyatda və digər şəkillərdə daha gözəl və səmimi gəlir. Filmin treylerində sanki çox az görsəm də qısa saçlarına görədirmi bilmədim ancaq daha solğun görünürdü. O filmdə əsas qadın qəhrəman Porpentina "Tina" Goldstein obrazını canlandıracaq. Ümidvaram aranızda Goldstein familyasını gördüyü an George Orwel in 1984 kitabını(kitab haqqında yazı üçün kitabın adına basın/klikləyin/tiklayin) xatırlayanlar oldu. ;)

Məni ən çox da fantastik filmdə gördüyümə təəccübləndirən isə aşağıda şəklini gördüyünüz aktyor Colin Farrell oldu.Aktyoru daha çox triller (thriller) janrındakı filmlərdə görməyə alışmış olsaq da bu filmdə fantastik filmdə öz bacarıqlarını göstərəcək. 
Alison Sudol isə Porpentinanın kiçik bacısı Queenie Goldstein rolunu oynayacaq. 

Dan Fogler  isə filmdə Jacob Kowalski olaraq qarşımıza çıxacaq.

Bu da filmin treylerləri. Bu arada blogger dostlarım mənə bloga youtube-dan bloga video yükləməyin doğru olub olmadığı ilə bağlı (xüsusilə aşağıdakı film trailer i kimi rəsmi videolar) məlumat verməyinizi xahiş edirəm. Çünki çox axtarıb az məlumat tapdım bu haqda. (sona qədər oxuyan bütün bloqqer dostlarımdan cavab gözləyirəm)

İkinci treylerdə isə daha çox Harry Potter soundtrackı, ya da bənzər saundtrak diqqətimizi çəkir. 

Ümidvaram yorulmadan oxudunuz və filmi izlənəcəklər listinizə qeyd etdiniz. Özünüzə yaxşı baxın. Hələlik.

Mən kiməm.

MİM № Bir bloqqer özü haqqında yazarsa..

  Bu mimə özüm özümü mimlədim. Halbuki başqa 2 mim artıq çoxdandır yolumu gözləyir. Tezliklə onları da bitirəcəm. Bu mimi isə, Gözdənin yazısından həvəslənib yazmağa başladım və bir də baxdım ki, bir yazı ortaya gəldi. Gözdənin yazısı üçün kliklə. Aşağıdakı soundtrack də həmin yazıdan sonra dinlədiyim və dinləyərək yazdığım musiqidir. Dinləyərək oxuyun. Yazı uzun olsa da bu yazıda hər şeydən bir az olduğu üçün nəticədə çox şey öyrənib, müxtəlif mövzularda oxuyacağınız üçün sonda yazı sizi heç yormayacaq. 

  Əslində özüm haqqında kiməsə məlumat verməyi o qədər də sevmirəm. Sanki ən böyük sirmiş kimi və bunu hamıya deyirəmmiş kimi hiss edirəm. Kim olduğumla bağlı çox düşünürəm. Düşündükcə də saysız fikirlər içində qalıram. Təkcə özüm deyil, uzun-uzun bütün dünyadakı insanları, yaşamağı sevib-sevmədiklərini, dünyada yaşama səbəblərini düşünürəm. Bu zövq aldığım mövzulardandır. 

Uşaqlara qarşı qəribə bir sevgim var. Onlarla oynamağı sevirəm. Xüsusilə də yolda uşaq gördümsə bəzən onlarla oynamamaq üçün özümü güclə saxlayıram. Ya da anasından gizlicə məsələn əlinə toxunub tez elimi çəkirəm. Uşaq kimin etdiyini görmək üçün ki ətrafına baxır çox sevirəm o anı. Uşaqlar sevinc dolu olur. 
Və keçmiş hamı kimi mənə də doğma gəlir. Televizorun kəşf olunmadığı, klaviaturada deyil də qələmlə ağ vərəqə yazıldığı vaxt kimi təsəvvürümdə olan illər. Bəlkə də, tanıdığımız bütün doğma insanların, ən doğma insanların keçmişdən gəlməsi ilə başlayıb hər şey. Bizim üçün yaşadığımız ilk keçmiş-dünyaya gəldiyimiz andan, yanımızda olan ilk doğmalarımız bəlkə də bizə keçmişi sevdirib. Mənim heç vaxt həyatda tanımadığım, görmək şansımın olmadığı Jeff (haqqında oxuyub, onu dinləmək üçün adı klikləyin)-ə olan heyranlığım və ya Martin İden (haqqında oxumaq üçün adı klikləyin/tıklayın)ə olan sevgim də yəgin ki musiqi və ədəbiyyatdan əlavə həm də keçmişlə də bağlıdır.

Düşüncələrim qarışıq və çoxdur. Ancaq çoxdanışan heç deyiləm. Yəni, asanlıqla bir mövzudan digərinə sürətlə keçə bilərəm. Deyək ki, bir mövzudan danışdığım vaxt həmin mövzu ilə yenisi arasında mənim üçün bir xırda əlaqə var. Bu zaman birincini yarıda saxlayıb həvəslə digərinə keçirəm. Yəni mənə qulaq asanda diqqət çox vacibdir. :D Fikirlərimi tam və bütün olaraq çatdırmaq üçün tələsdiyim də olur. Bir nəfəsə həvəslə danışıb hər şeyi qarşımdakı insana çatdırmaq istədiyim anlar.

Məncə insanların öz simalarından əlavə daxili, ruhları da simalarında əks olunur. Danışıqları ilə, kimisi dərin fikrə daldığı zaman və ya ağladığı zaman qəlibi(kalıb, görünüşü) deyil də əsl özünü gördüyümüz vaxtını həmişə yadımızda saxlayırıq.

 Bu səbəbdən insanlar hər kəsə fərqli görünə bilər. 

Ümumilikdə dünyanı hamımızın eyni cür və eyni rəngdə gördüyümüzə inanmıram. Tam olaraq heç kim bunu sübut edə bilməz. Yaşıl rəng bəlkə də mənə görə bir az daha tünd başqasına görə daha açıq rəng görünür. Tam olaraq bunu necəsə sübut etməyin mümkün olduğunu düşünmürəm. 

Dostlar mənim üçün çox önəmlidir. Ancaq həm də dostlarıma qarşı qısqancam. Özümü haqlı da hesab edirəm. Mənim ən yaxın dostumun başqa bir insanla yaxın olduğunu görəndə və orada yoxamsa əlbəttə bu mənə yaxşı təsir etməz. Dostlarımı sevdiyim qədər yalnızlığı da sevirəm. Uşaqlıqdan tək oynamağı daha üstün tutmuşam. Yaşıdlarımla əlaqə qura bilməsəydim bu mənim üçün problemə çevrilməzdi. Çünki mənim artıq özümün xəyali dostlarım vardı. Dünya qəribədir. uşaqların öz-özünə danışması və oynaması normal qəbul olunduğu kimi, böyüklərin öz-özünə eyni şəkildə danışdığı görsək onu dəli, ən yaxşı halda psixoloji problemləri olan insan adlandırarıq. Uşaqlar dünyaya və dünyanın normal hesab olunan qaydalarına yad olduqları üçün bizdən daha azaddırlar. Onlar üçün hər şey yenidir. İstəmədiklərini, istədiklərini demək onlar üçün çətin deyil.

Məncə insan tənhalığı unutmamalıdır. Əsl özünlə üzləşib, onu, özünü tanımaq üçün yalnızlığı da sevməlisən. Bəzi şeylər tək ikən daha çox zövq verir. Kitab oxumaq, ya da musiqi dinləmək ola bilər. Ya da düşünmək, özün haqda yox, bütün dünya haqqında, normalda qəbul etdiyin şeylərin dərinliyini düşünmək. İnsanların necə bir varlıq olduğunu düşünmək. məncə, kitab oxuyanların içində bu cür düşüncələri olan insanlar da çoxdur. Kitab mənə daha çox insanı tanımağa, daha çox təcrübə qazanmağa imkan verir. 

Piano uşaqlıqdan ən çox sevdiyim musiqi alətidir. Həmişə pianino çalmaq istəmişəm. 
Hər pianino çalındığı anda gözümün önünə pianinonun  notlara uyğun dilləri gəlir (çalmağı bilirmişəm kimi hiss yaranır)və əllər, həm sürətli və həm də sakit qəribə ahənglə çalan əllər. 

Ümumilikdə musiqini çox sevirəm. Musiqi asanlıqla əhvalımı o an dəyişə bilər. Ən sevincli anımda dinləyəcəyim mahnının ilk notları artıq yetərlidir, bütünlüklə o andan sevincim kədərlə əvəz oluna da bilər. Kədər sadəcə hər hansı bir pis hadisə ilə əlaqəli olmaya da bilər. 

Bəzən hisslər heç nə ilə əlaqəli olmur. Səbəbsiz sevinc, səbəbsiz kədər düşür içimizə. Bütün ruhumuz bununla əhatə olunur. Məncə o ən təmiz hisslərdir. Saf, qatqısız . Bütün dünyadakı sizi və digərlərini unudub, musiqinin bir hissəsi olmaq. Musiqinin bir hissəsi kimi var olmaq-kimi qəribə duyğuları bəzən musiqi dinlədiyiniz zaman yaşayırsınızsa məncə axtardığınız musiqini, mahnını tapmısınız. 

Fiqurlu kankisürməni çox sevirəm. 
Musiqi, rəqs birlikdə xüsusilə də buz üstündə olması başqa bir incəlik qatır. Büzüstü kankini sevməyən insan təsəvvür etmirəm. 

Valentin günü üçün fanlarına etdiyi hədiyyə ;)

Fiqurlu kankisürmədə ən sevdiyim idmançı isə Yuzuru Hanyudur. İlk dəfə ictimai tv-də canlı Soçidən yayımlanan yarışları izlədiyim zaman Yuzurunun yıxıldığı an çox pis olmuşdum. Sonrakı iştirakçıların da yıxılmasını o qədər çox istəmişdim. Çünki belədə Yuzuru yaxşı yer tuta bilərdi. Yıxılmağına baxmayaraq heç nə olmamış kimi çıxışına davam etməsi isə xüsusilə mənim diqqətimi çəkmişdi. Nəhayət sonda qızıl medala layiq görüləndə isə çox təəccübləndim və sevindim. Yuzuru çox çətin tapşırıqları mükəmməl yerinə yetirir və artistizmi onda daha çox hiss edirəm. Həmin videonu izləyin.

Bundan əlavə balet sevməsəm də tək bir balerin qızın sakit ritmlərə uyğun və musiqisiz rəqsi məni çox cəlb edir. Musiqi o an olsa da çox sakit ritmlərlə olmalıdır.

Mən uşaqlıqdan Tom Və Cery (Tom & Jerry) kimi cizgi filmləri deyil, Digimon, Ay savaşçısı (Sailormoon) kimi cizgi filmləri daha çox sevirdim. İndi də fikrim dəyişməyib. 
Uşaqlıqlarından insanların sanki çox keçmişdəki yad insan kimi danışmaqlarını həmişə görəndə çox qəribə hislər kçeirirəm. Uşaqlıqdan bu səbəbdən insanın uşaqlıqdan böyüklüyə keçəndə dəyişdiyini düşünürdüm. Böyüməyə çox can atırdım. Böyüyəndə məndə nəyinsə dəyişəcəyini düşünürdüm. 

Ancaq hələ də o dəyişiklik, gözlədiyim sehirli dəyənək dəyməsi qədər fərqli bir şeyin yaşanacağı an gəlməyib. Anladım ki, böyüdüyün zaman heç nə dəyişmirmiş. Məcburi hamının keçdiyi bir dəyişiklik yoxmuş. İnsanlar istədiyi üçün dəyişirmiş. Mən ancaq uşaqlıqdakı məndən fərqləndiyimi düşünmürəm. Görünüş olaraq dəyişsəm də, hələ də çəkinməsəm saatlarla topla oynamaq, gizlən-qaç oynamaq hələ də mənim üçün əvəzolunmazdır. 



Rok musiqisini dinləməyi sevirəm. Ümumilikdə hər ölkənin mahnısını sınayıb dinləməyi sevirəm. Bu ayrı bir həyəcan verir. Türkiyə, Rusiya, Cənubi Koreya, Yaponiya, Çin, Norveç, Finlandiya və başqa ölkələrdən telefonumda hər gün dinlədiyim mahnılar var. 
Nəhayət mimi sona çatdıra bildim. Ancaq mən də tükəndim. Ümidvaram sevərək sonadək oxuyacaqsınız. Rəylərinizi (yorum, comment) yazmadan blogdan çıxmayın. Bu arada Mimi kimlərin edib kimlərin etmədiyini bilmirəm. Mənim kimi siz də mimi sevdinizə mimlənmiş sayılırsınız, yazın mən də oxuyum ;)

George Orwell 1984

Corc Oruel 1984

Janr: Utopya və disutopya ədəbiyyatı, siyasi ədəbiyyat, sosial elmi                       fantastik ədəbiyyat
Çap Tarixi: 1949.il 8 iyun
Orijinal dil: İngilis dili.
    Uinston Londonda yaşayan və Həqiqət Nazirliyində işləyən adi vətəndaşdır. Uinston Smisin yaşadığı dünyada hamı, hər yerdə hətta insanlar yaşadığı evlərində quraşdırılan teleekranlar sayəsində izlənilir. Uinstonu digərlərindən fərqləndirən isə partiyaya olan gizli hər gün bir az da artan nifrətidir. O düşünməyi və ətrafındakı hər şeyi sorğulamağı bacarır. Uinstonun işinin də bunda rolu var. Belə ki, o tarixi qəzet və kitablarda qeydləri dəyişməklə məşğuldur. Hər dəfə bəzi insanları Partiya tarixdən siləndə onların keçmişdəki işləri də silinir. Bu zaman keçmişdə həmin şəxslərin qəzet və kitablardakı adları, xəbərlərini dəyişmək Uinston kimi işçilərə düşür. Digərləri isə nə qədər qəribə olsa da bütün bu dəyişikliklərdən xəbərsizdir. İnsanlar Böyük Qardaşın dediyi hər şeyə inanır. Hər yerdə Böyük qardaşın şəkli var. Uinstonun yaşadığı Okeaniyada düşüncə azadlığı qadağandır və düşüncə cinayəti adındakı bu növ ən dəhşətli cəzaların verildiyi bir cinayət növüdür. İndividual insanın varlığı deyəndə ağla gələn hər şey Okeaniyada Partiya tərəfindən qadağan edilib. Burada evlilik də yalnız partiyaya olan borcu yerinə yetirmək üçündür. Əgər tərəflər arasında sevgi hiss olunsa onların evliliyinə icazə verilmir. Uşaqlar kiçik yaşlarından casus kimi böyüdülür. Tarix yalnız partiyaya aiddir. Hər ixtira partiyanın adına yazılır. Ancaq Uinstonun öz uşaqlığı az da olsa yadındadır. Onu həmişə yuxularında narahat edən, kabus görməsinə səbəb olan ailəsi həmişə onu narahat edir. Ancaq o tam olaraq heç nə xatırlamır. Uinston bir dəfə özünə gündəlik alır. Bundan sonra isə o artıq öz düşüncələrini gündəliyə yazmağa başlayır. Hər şey də bundan sonra başlayır. O artıq düşüncə cinayətini həyata keçirirdi. Yalnız adını eşitdiyi partiyaya qarşı olan qardaşlıq təşkilatı və Goldstein haqqında maraq hər zaman ona üstün gəlir. Uinston qara camaat adlanan insanlara qibtə edir. Baxmayaraq ki, status olaraq onlardan qat-qat yuxarıda idi. 
Okeaniyada aşağıdakı nazirliklər fəaliyyət göstərir.
Sülh Nazirliyi, Həqiqət Nazirliyi, Sevgi Nazirliyi və Varlılıq/bolluq Nazirliyi. Hər nazirliyin isə iş prinsipi demək olar ki öz adının əksi idi. Məsələn müharibə ilə bağlı işlər Sülh Nazirliyinə aid idi. 

Arasında ən qorxuncu isə Sevgi Nazirliyi idi. Bu nazirlikdə yalnız partiyaya və Böyük Qardaşa sevgi aşılanırdı. Sevgi Nazirliyində insanlara ən ağır cəzalar verilirdi. Ən qorxunc otaq isə 101 nömrəli otaq idi. Bu otağa göndərilənlərin sonu hamıya qaranlıq idi. 
Okeaniyadan başqa yalnız iki ölkə vardı. Avrasiya və Şərqiasiya. Okeaniya həmişə bu ölkələrdən biri ilə sülh digəri ilə isə müharibə şəraitində idi. Ancaq hansı ölkə ilə müharibə, hansı ilə sülh şəraitində olduğunu dəqiq demək olmurdu. 
Əsas obrazlar: Big Brother/Böyük Qardaş- Qara gözlü, bığlı, Partiyanın təcəssümü olan Okeaniyanı idarə edən şəxs.
 Winston Smith/Uinston Smis- hekayədəki qəhrəman,                                                                        fleqmatik/soyuqqanlı, adi vətəndaş
Julia/Culia- Uinstonla eyni yerdə işləyir. Sonradan Uinstonla                                münasibətləri dəyişəcək.

Sonia Orwell

qeyd. Culia obrazı yazıçının ikinci həyat yoldaşı  Sonia Oruell-dən təsirlənək yaratdığı bir obrazdır.

O'Brayn- Uinstonla eyni yerdə işləyir. Nədənsə ilk baxışdan həmişə                 Uinston onu özünə dost hiss edir.
Emanuel Goldstein- Okeaniya partiyasına qarşı yaradılan                                                 qardaşlıq gizli birliyin lideri. 
Syme- Bu obrazı xüsusilə ona görə qeyd edirəm ki, onun sayəsində             yeni şeylər öyrənəcəyik. Yeni dilin, lüğətin yaradılması və               bunun arxasındakı əsas niyyəti bizə Syme izah edir. Ancaq               əlbəttə ki, o bunu fəxrlə deyir.

Əgər fikirlər dili korlaya bilirsə, dil də həmçinin düşüncəni korlaya bilər.

Mənim kitab haqqında fikirlərim.   Kitab sizə yeni bir dünyanı təqdim edir. Gələcəkdəki həyat həmişə insanları çox maraqlandırıb. İnsanlar bənzər mövzuda oxumağı, eşitməyi sevir. Bu kitabda da eyni mövzu işlənib. Ancaq bu yeni dünya, gələcək gözlədiyiniz kimi deyil. Kitabın ilk səhifəsindən etibarən özünüzü yaşadığınız dünyadan uzaq hiss edəcəksiniz. Kitabı oxuyanda onu yaşamaq tam da bu kitabı oxuduğum zaman həmin hissləri yaşadım. Yazıçı bu qurduğu yeni dünyasında hər şeyi ən kiçik incəliyinə qədər qeyd edib bizə təqdim edir. Kitabın adı da o zaman yazıçının təxminən kitabın çap olunduğu ilin tərsi olaraq adlandırdığı, seçdiyi ildir. Əslində isə yazıçının ikinci bir seçimi də vardı. The Last Man in Europe/ Avropada Son Adam. Ancaq sonradan indiki adı seçir. 

Daha maraqlısı isə kitab haqqında araşdırığım zaman qarşıma wikipediadan çıxan bu şəkil oldu. Bu isə yazıçının daha çox gələcək adı altında günündəki problemləri göstərdiyini deməyə əsas verir. Kitabı oxuduğumuz zaman da biz bunu hiss edirik. Sanki kitab tam olaraq gələcək ya da keşmiş deyil. Kitab mənə keçmişlə gələcəyin arasında ilişib qalan zaman kimi göründü. İlk şəkil 1930-cü illərin ortasında çəkilib və ikinci şəkildən fərqli olaraq Stalinin yanında dayanan şəxs isə Nikolay Yezovdur, hansı ki 1940-cı ildən sonra yeni versiyada artıq yoxdur və silinib. 





Xüsusilə sonu heç gözləmədiyim kimi bitdi. İnsanı düşündürən kitabdır. Eyni zamanda kitabı oxuduğunuz zaman kitabın qəhrəmanı kimi izlənildiyiniz hissi sizə hakim ola bilər. Kitabın təsirlərindən biridir. Eyni zamanda bu kitab müasir dövrdəki insanların Cctvlər və digər texnoloji yeniliklər sayəsində izlənildiyini nəzərə alsaq həqiqətən də yazıçı gələcəyin, inkişafın müəyyən mənada getdiyi inkişaf yolunu təxmin etmiş də ola bilər. Aşağıda son olaraq kitabdan bəzi hissələr oxuyacaq və kitabın müxtəlif illərdə üz qabığı ilə tanış ola biləcəksiniz.

ingilis sosializmi. qeyd:bu şəkil filmdəndir, kitabda partiyanın buna bənzər bir simvolu haqda yazılmayıb

Müharibə Sülhdür
Azadlıq Köləlikdir
Cahillik Gücdür
Böyük Qardaş sizi izləyir
Birin Azlığı
Mən səni Satdım&Sən Məni Satdın
İki plus İki Beş Edir
Bizim Əmrlərimiz "Sən İncəsənəti"
O Azadlıq idi
O əsl Söz idi
Reallıq zahiri deyil
Fikir Cinayəti, Onlar bunu belə adlandırdı
Onlar heç vaxt üsyan etməyəcək
Bu yaxşıdır, Hər şey yaxşıdır
Əziyyət Bitirildi/Sonladı








Kim ki Keçmişi idarə edir, Gələcəyi də idarə edir. Kim ki, İndiki zamanı idarə edir Keçmişi idarə edir.
Güman ki insan sevilməyi başa düşülmək/anlaşılmaq qədər istəməzdi.